مُحَمَّد عقِيلة .

أنا من الناس اللي التفكير الترابطي عندي واخذ حيز كبير ، عبارة عن شنو لما العقل يبدا يربط بين حاجات في الظاهر ما ليهمش علاقة بعضهم بكل ، أو يلقى روحه يربط في مواقف وقصص قديمة بمشكلة جديدة طالعة قدامه توا ، وفجأة تطلع في راسك فكرة أو حل سمح ما كانش يخطرلك علي بالك بكل .

كانك أنت مصدق من جدك إنك ما تملكش السيطرة علي حاجة معينة ، راهو رضيت بيها وتقبلتها كأمر واقع وخلاص ، لكن شنو هي الحاجة اللي واحل فيها ومش قادر تتقبل إنك ما تملكش السيطرة عليها ، وشنو اللي يخليك تفكر أو ترجى في حاجة عكس هكي .

ديما يتهيألنا إن تقدير الذات والثقة بالنفس حاجة ثابتة ما تتغيرش ، حالة هكي يقعد فيها عقلك بروحه يغذي فيك بأفكار سمحة وتدعمك ، وما يتأثرش بكل بأي شك ولا بمشاعر كره .

تعلم تحب الحاجات اللي ما تكلفش واجد ، لأن هي هذي الحاجات اللي تستاهل وقتك فعلاً ، تقدر بفلوسك تشري وتوصل لأي مكان وأي حاجة ، لكن عمرك ما تقدر تشري التجربة والجو نفسه .

بما إن التجربة ديما فيها أبعاد واجد ، ف تلقى عندك تشكيلة واسعة من الذكريات ، والمواقف والمشاعر والأفكار اللي تقدر تختار تذكرها وتسترجعها ، والحاجة اللي حتختارها توضح حالتك الذهنية والنفسية توا كيف دايرة .